//
you're reading...
Adat, Budaya

Manjapuik Marapulai

ma nyo angku,angku,niniak mamak nan gadang basa batuah sarato bapak kami silang nan bapangka karajo nan bapokok,dek ado nan manjadi ujuik jo mukasuik sarato buah rundiangan di kami taradok bapak kami silang nan bapangka karajo nan bapokok,alah koh bana kami katangahkan.

(lah bananyoh)

sungguahpun kapado angku,ampun diminta kapado Allah,maaf dipinto bakeh niniak mamak nan gadang basa batuah,iyo juo bak pituah rang tuo, kok tasabuik ambo di nan senteang nak dibilai kok kurang nak ditukuak.jikok nyo salah minta diasak ka nan bana,sipi nak dikatangahkan,kok tasabuik di nan bukan minta diasak ka nan iyo.kok lah iyo nan dalam pariyokan bapak kami nan baduo batigo.

sambah ambo sambah baririk diparirikan diateh rumah gadang nangko. salam sa ujuik nan jo simpuah, ibarat bungka nan piawai,naraco luruih main, daun indak basibak jo basisieh indak babateh jo bahinggo.

salam kapado niniak mamak nan gadang basa batuah, sandi andiko dalam kampuang tampuak jo tangkai dinagari, kapai tampek rang batanyo kapulang tampek babarito.Nan

bak kayu gadang di tangah koto, ba urek balimbago matan, badahan cupak jo gantang, barantiang barih jo balabeh, badaun rimbun jo adat, babungo mungkin jo patuik, babuah kato nan bana.Buliah baselo di ureknyo, dapek basanda di batangnyo gantungan cupak nan duo, partamo cupak usali, kaduo cupak buatan.

Salam kapado bapak kami,urang nan arih bijaksano ibaraik payuang panji marewa alam,tingginyo saanjuangan,lebanyo mangalauangi.

pulang pasambahan bakeh bapak kami silang sapangka karajo nan bapkok .manyo bapak kami aratinyo lah pituah di nan tuo

sajak samulo rantiang bapatah ,sumue bakali,aie basauak,pangulu badiri dalam nagari.jalan duo nan baturuik kato duo nan bapakai.kk dikaji jalan nan duo, partamu jalan adaik kaduo jalan syarak.

mangaji kito sapanjang jalan adaik iyolah babarih babalabeh bacupak bagantang,basuri batauladan,bajanjang naiak batango turun

magaji kito sapanjang jalan syarak iyolah mangatahui iman,islam,tauhid,makrifah,sah jo bata,halal jo haram,sunaik jo paradu,haruih jo mukaruah.

manyo kato nan duo,partamu kato buek,kaduo kato pusako.
buek bana kadipakai pusako bana ka dirunggusi.

lampisan kaji dalam nantun,nan lazim nyenyo adaik,nan bana nyenyo syarak,nan laku nyenyo kitabullah.adaik basandikan syarak syarak basandi kitabullah

balampsan pulo kaji dalam nantun,bak pituah adih malayu;urang arih mangarek kuku,dikarek jo pisau sirauk,sirauik parauik batuangtuo.tuonyo elok kalantai.

adaik nagari babilang suku,suku bablilang buah paruik,itulah barih nan bapahek ,ico nan bapakai.

mangko dinamokan urang nan salapan indu.
nagari dibari barajo,luhak di bari bapangulu.

guno nagari dibari barajo;sakik bakeh maimbaukan ,mati bakeh marapuikan.

guno luhak bari barajo;pai bakeh mangadu,pulang tampek babarito.

diateh gadang babingkah tanah basa balingkuang aue,supayo a itu,supayo nak maharuihkan sumando manyumando dari suku lain ka bagadang lain.

di nan bak sakarang nangko,lah tumbuah sumando saparti wak kami kabagadang Korong rang koto

sumando nangko balarauh pulo tantangannyo.

a nyo nan manjadi larauhnyo,pihak nan tadaulu alah,nan takamudian lay.

dipiihak nan tadaulu alah,baiak sahari duo hari,sapakan duo pakan,alah babulan bataun lambek maso nyo.

dek Allah ta’ala mantakadiekan.lah manaruah baliau anak sikabaikan.
anak si kabaikkan ko duo pulo wajah nan dikanduang nyo.
partamu anak sikabaikan silaki laki,kaduo anak sikabaikan si parampuan.
kok mangaji kito sapanjang anak sikabaikan silaki laki iyolah,
ketek dibaok kasumue,di aja mandi,di asok ,di asuah,dibari makan,dibari bagombak limo.
kaganti cincin dikalngkiang kaganti ameh dalam puro,
pamenan ibu jo baponyo,cahayo kampuang jo hilaman.

paga nagari sumarak tapian.kok tingginyo lah bak ditambak,gadangnyo lah bak di anjuang

itulah manko diambiak sariak drancuang talang,talang bak raso kabaungo.

dari ketek di nanti gadang,gadang lah tau ereang jo gendeang,lah tau malu j raso ,tau di raso jo pareso,lah tau di manih aie tabu,tau dipakek tangguli.

tau mamahek jo maukie,tau dirancak ragi bungo.tau di awa jo akie pakarajaan nangko,

iyo lah biaso nan kadijapuik ka dijangkau urang nan kamamakai nan sapanjang adaik.

tumbuah di anak sikabaikan si parampuan baitupulolah tantangannyo,

ketek dibaok kasumue,di aja mandi,di asok ,di asuah,dibari makan,dibari baambuik panjang.

kaganti cincin dikalngkiang kaganti ameh dalam puro,

pamenan ibu jo baponyo,cahayo kampuang jo hilaman.

limpapeh rumah gadang.

kok tingginyo lah bak ditambak,gadangnyo lah bak di anjuang

itulah manko diambiak sariak drancuang talang,talang bak raso kabaungo.

dari ketek di nanti gadang,gadang lah tau ereang jo gendeang,lah tau malu j raso ,tau di raso jo

pareso, tau di awa jo akie pakarajaan nangko.

iyo lah nan biaso kadijauikan kadijangkaukan urang

nan kamandirikan nan sapanjang adaik.

di nan bak sakarang nangko,lah tumbuah dikami anak sikabaikan si parampuan kok tingginyo lah bak ditambak,gadangnyo lah bak di anjuang

dari ketek di nanti gadang,gadang lah tau ereang jo gendeang,lah tau malu j raso ,tau di raso jo tau mangarok,jo malapak,tau mauleh jo mananun tau mauleh banang putuih,manbuhue indak mangasan tau di raso pareso, tau di awa jo akie pakarajaan nangko.iyo lah nan biaso kadijauikan kadijangkaukan urang

namun disakarang nangko,ibaraik siriah balun bajunjuang ibaaik ayam balun barindu,itulah mangko di carikn ka junjuangan nyo

adopun maso daulunyo, bapisuruah kami kabakh amai kami bacapek kaki barinngan tangan.manampuah rumah gadang nangko,dek hari kolah nan elok kutiko kolah nan baiak,ditarimo dek bundo kanduang limpapeh rumah gadang nangko, tasbuik bundo kanduang uarng nan arih bijaksno limpaeh rumah nan gadang sumarak anjuang paranginan, , badantiang lega caranonyo rancak susun siriahnyo,sikalek manih namo pinangmudonyo

Ujuik kato buah rundingan, sakiro paham di kahandaki, bahubuang jo maso nan ditampuah, dek maliek di ateh rupo, basiang ateh nan tumbuah, manko padan alah di ukue janji alah di takuak.

baiak lah dikami nan adie ditangah runmah gadang nangko, dituruik labuah nan panjang,jalan nan baliku.labuah panjang bakalalaran,labuah singkek pinteh maminteh,mangko tapinteh ka Korong kampuang nangko.lalu tibo tangah halaman,dibasuah kak i di tapak janjang lalu naiak ateh rumah manampakan muko nan janiah hati nan suci,manuruti padan nan alah diukue manapati janji alah di takuak, mamnjapuik manuruik adaik sutan mudo kajadi junjungan puti bungsu dikorong kampuang kami.

Balampisan kaji dalam manjapuik,manantiangkan kami adaik panjapuik,adaik panjapuik nangko kin balipek kain baliwek,kain panunang saribu nunang,siriah nan diatek ameh nan dibawah uang nan limo kupang kanamonyo.

Kok lah dalam barih jo balabeh dalam cupak jo gantang kabaneran kami nan katangah iyolah nak di tarimo suko,kok banamo dilua nak di kadalamkan

sakian sambah j titah kami himpunkan

(ditulis oleh hendra_kotto)

Discussion

No comments yet.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Video

Photo Pemandangan

Minangkabau scenery

Two players

Behind the grass

Sungai Tanang

More Photos

Stats

  • 59,528 hits

Pengunjung

Twitt Box

%d bloggers like this: